Judson Zumhnak Hrampi: Philhmi le Hlawtmi a Si Maw?

Adoniram Judson kong an ttial tawn ah hin a innchung khar kong, a ca cawnnak kong, America in Burma ah a ratnak kong, Burma ah kum 37 chung Pathian rian a ttuannak ah aa pumpeknak, harsaknak a tonmi hna le Baibal a lehnak kong deuh hi ttial a si. Judson kong hi mission le ministry lei in doctorate degree a lami tampi nih an dissertation ah zeimawzat an ttial. 

Sihmanhsehlaw, Judson nih Kawlram ah Khrihfabu a rak dirh lio ah zeibantuk theology siloah zumhnak dah a rak cawnpiak ti chim le ttial a umlo ti awktluk in a tlawm. Asiahcun, Kawlram Baptist Khrihfabu le member pawl nih kan siangbawi a simi le kan pu a simi Judson nih aa tlaihmi zumhnak (theology) siloah Khrihfabu a rak cawnpiakmi zumhnak hrampi hi kan philh cang maw? Kan rak hlawt dah? 

Nihin July thla, ni 13, kum 2022 cun Judson kawlram a phanhnak kum 209 a tling cang. 1 Cucaah, kawlram ah thawngttha ceunak a rat pitu Judson philhlonak le upat peknak ah zapi nih kan chim, kan rel, kan ttial tuk lomi, Judson nih Burma ram Baptist Khrihfabu hna cawnpiaknak ding caah a rak ttialmi a hramthawk lio Baptist Khrihfabu zumhnak hrampi kong ca tawi te ka vun ttial.

Judson le Tipil In Kong:

Mission riantuan dingah Congregational Khrihfabu nih Judson an rak thlah. Judson a pa zong cu Khrihfabu ahcun minister pakhat a rak si. Congregational Khrihfabu i member pakhat a si bantuk in, Congregational Khrihfabu nih an zumh bangin hngakchia tipil peknak an hmang. Kum 1812, February thla 19 ah Judson le a nupi Ann (an hawi le Samuel le Harriet Newell tiin) Plymouth in Calcutta kal ding ah an i thawh. Caravan timi an tilawng cu Calcutta, India ram ah June thla 17, 1812 ah a phan. 

Judson le a nupi Ann cu thlapi thla li chung tilawng cungah tipil innak kong he pehtlai in Baibal nih zeidah a cawnpiakmi a si ti hlathlainak biatak tein an tuah. 3 Cu hlan Andover College a kai lio ah Greek holh in tipil in timi biafang (baptizo) a sullam a rak hlat bal cang. Cun, India ram phanh tikah William Carey (English Baptist missionary) he iton ding a si caah tipil in kong he pehtlai in biaruah a hau te lai ti ruahnak a ngei i a zumhnak (hngakchia tipil pek khawh a si) kha runven a duh. Cu lawng siloin, mission riantuannak hmun ka phanh tik ah zeitindah tipil ka pek lai ti fiang tein theih a duh. A cakuat pakhat ah, Judson nih “Baptist si ding ah a pel te hmanh ka ruat bal lo…tipil in kong hi phehthuh lo tein chim ahcun ttha tein (lungtling tein) ka hlat rih lo,” tiah a ttial. 

Thlapi thlali chung tipil in kong Baibal a hlat hnu ah tipil in timi hi a Khrihfabu Congregationalist nih an zumhmi “titheh/ titoih” (sprinkling) siloin tipil in a sullam cu ti chung ah hnim (immersion) a si ti aa fiang. Cu lawng si rih loin, Jesuh Khrih a zummi lawnglawng nih tipil in ding a si, tiah Baibal cawnpiaknak a hmuh.

Cuticun, Judson le a nupi Ann cu Congregational Khrihbu member in Baptist Khrihfabu member si ding in bia an khiah. Kum 1812, September thla, ni 6 ah London Missionary Society nih thlahmi William Ward nih Judson le a nupi cu Culcutta i Lal Bazaar Chapel ah tipil a pek. Cuticun, Judson cu Baptist missionary tiin vawlei cung tuanbia ah philh lo ding in ttial le khumh a si.

Congregational Khrihfabu nih Asia lei ah mission rianttuan an thlahmi Judson le a nupi Ann cu India ram an phanh ah Baptist Khrihfabu ah an i tthial. Tipil in kong he pehtlai in a zumhnak aa thlennak kong cu Congregational Khrihfabu hruaitu pakhat a simi Dr. Worcester sin ah cakuat in theihternak a tuah. Congregational Khrihfabu hruaitu hna le an hawi le mawhchiatnak le thangchiatnak tampi an ton (Cu kong cu hmun dang ah kan ttial te lai).

Judson nih Pathian bia ning tein a sullam a hrihfiah i a zumh i a zulh caah kan kawlram pi ah Baptist a hrampi cu a rak bunh. Judson nih Baibal a hlat hnu ah a hlan a zumhnak a simi hngakchia titheh/titoih nak (pedobaptism/infant baptism) kha a hlawt i zumtu tipil peknak (believer’s baptism) timi Baptist zumhnak le hmanning kha a cohlan. Cuticun, Judson hmangin Pathian nih Baptist khrihfabu a rak dirh i tu kum 2022, July 13 in Kawlram ah Baptist Khrihfabu a dirnak cun kum zahnih le kum kua (209) a vun tling ruangmang.

Judson Zumhnak Hrampi: 

A tanglei ah Francis Wayland nih a khawmh i a ttialmi Memoir (cauk ukhnih) i cauk ukhinhnak ah aa telmi “Burman Liturgy” kong ka vun hrawmh. “Liturgy” timi sullam cu Biakinn chung i zapi Pathian biakning ti a si. Burma ram a phanh kum16 hnu hrawng ah Judson nih amah sin a phanmi missionary pawl le an mah a bawmtu Kawlram mi hna cawnpiaknak ah hman ding in Burman Liturgy cu kum 1829 ah a rak ttial. Burman Liturgy hi Kawlholh in rak ttialmi a si i mirangholh in an leh. Phun dang in chim ahcun Burman Liturgy cu missionary hna le a bawmtu hna nih an theih dingmi le pom dingmi zumhnak hrampi a si. Khrihfabu thar an dirh tik poah ah zumtu an member hna kha an zumhnak zeidah a si ti fiang tein thei hna seh tiin cawnpiakmi creed siloah zumhnak hrampi a si. Cu a ttialmi ah zumhnak hrampi, suttung (article) 12 a um.

Judson nih kum 1829 lio ah a rak ttialmi “A Creed, in Twelve Articles; or, A Summary of the Doctrine of the Lord Jesus Christ” cu a fiannak le a tawinak in ka vun hrilhfiah. 

Article 1 # A hmun zungzalmi Pathian pakhat lawng a um. Amah cu kan theihkhawh kan i fian khawh lo tiang in tthat tlinnak a ngei, zungzal a hmun, a lian i a ngan, zeizong vialte theitu, le zeizong vialte le vawlei vialte Sertu a si. 

Article 2 # Baibal ah Biakam Hlun le Biakam Thar timi Pathian biatak a um. Biakam Hlun cu uk 39 a um i Biakam Thar ahcun uk 27 a um. Pathian thawchuah hnawhmi tangah Pathian nih bia a ruahmi prophets hna le lamkaltu hna hmangin ttialmi Pathian bia, Baibal a si. 

Article 3 # Baibal ning zulh in minung cu a hramthawk ah dinnak le thianhlimnak in sermi a si. Sehtan bia a ngaih ruangah Pathian nawlbia a buar i a dirhmun ttha in a tlu. Cucaah, minu le mipa cu an hrinsor dihlak he tiin sual sinak an i lak i an rawh caah hell tla ding ah aa tlakmi dirhmun ah an dir.

Article 4 # Pathian nih minung cu a tlu lai i aa rawk lai ti a hramthawk tein a hngalh caah a zaangfahnak thawngin mi cheu cu a thim hna i sualnak le hell chung in khamhnak ding caah a Fapa sinah a pek hna. 

Article 5 # Pathian Fapa cu Pa nih a thimmi hna khamh ding ah, caan a hung phanh tik ahcun, Pathian tthawnnak in nungak thiang Mary paw chungah a cuang. Pathian sinak le minung sinak a ngeimi Khamhtu Messiah in a chuak. Pathian nawlbia kha tling tein a zulh i a nunnak cu mi caah a pek. Cross ah tuar innnak faktuk a ing i a thihnak thawng in amah a zummi hna caah khamhnak a pek. 

Article 6 # Nithum hnu ah Bawipa Jesush Khrih cu thihnak in a tho. Vawlei cung ah ni sawmli a um hnu ah vancung ah a zultu pawl hmuh in a pum in a kai i Pa Pathian sin ah a um. 

Article 7 # Khamhnak hmuh ding ahcun Bawipa Jesuh Khrih kan zumh i a zultu kan si a herh. Thiang Thlarau tthawnnak in nuntharnak kan hmuh i sining thar ah thlen kan si. 

Article 8 # Zultu a simi poah nih Khrih vailamtah hmang in sual ngaihthiamnak kan hmuh i zumhnak thawng in Khrih he pumkhat kan si. Khrih dinnak cu hrawmh kan si cang i zungzal lawmhnak, vancung khua a hmu dingmi kan si. 

Article 9 # Cucaah zultu hna cu hi vawlei cung ah an nun hlun sinnak chung in luatnak tling an hmu rih lo nain, sualnak chung ah an tlu thai lai lo. Thiang Thlarau velngeihnak thawng in an thih tiang Pathian nawlbia zulh ding ah him tein chiah an si. 

Article 10 # Thih tikah, zultu hna i an thlarua cu Bawi Jesuh Khrih sin ah a phan. Jesuh Khrih cu vancung in a pum in a tum lai; mi tthi vialte cu a tthawnnak in an tho lai i Khrih hmai ah biaceih ding in an dir lai. 

Article 11 # Biaceih ni ahcun, a zultu hna a ngaihthiamnak le an dinnak kong cu zapi hngalh tein a thanh lai. Cuticun, zultu hna cu zungzal lawmhnak, Pathian umnak hmun a simi van cung khua ah an lut lai. 

Article 12 # Zultu a silomi hna, sualnak in a khamh khotu Bawi a zum lomi hna, cu cu ni a phanh tikah cun dornak an hmu lai lo. An nih cu an pum le thlarau he tiin hell ah hlonh an si lai.

A hmasabik kan siangbawi a simi Adoniram Judson nih Pathian lianhngannak (God’s sovereignty) a zumh. Sermi thil vialte thawk in (creation), mi sualmi hna khamhnak pek dingin le (redemption), van le vawlei a donghnak tiang (consummation), zeizong vialte hi Pathian kutcak tangah le chungah a um ti a zumh.

Judson nih a ttialmi zumhnak hrampi cu hi tiin a tawinak in ttial khawh a si. Sertu Pathian sinak, Baibal hi Pathian Bia a sinak, misual hna caah velngeihnak in a khatmi khamhtu a sinak, Jesuh Khrih cu ngaknu thiang in pawimi a si i Pathian sinak le minung sinak, sinak pahnih a ngeihnak, thihnak in a thomi a sinak, Jesuh a zultu cu Thiang Thlarau thawngin nuntharnak an hmuh i zunzal nunnak zong pek a sinak, Jesuh Khrih hi vawlei ah a rat tthannak le biaceih ni ah 5 zultu hna nih luatnak an hmuh i zumlotu hna cu hell ah hlonh an sinak hna hi Judson nih a biapi ngai in a cawnpiakmi cu a si.

Biatlang Kawmhnak: 

Kan siangbawi, zumhnak ah kan pu a simi Judson nih tipil in kong ah Baptist Khrihfabu cawnpiaknak hi Baibal nih a chimning a si tiin a cohlan. Cuticun, American Baptist Khrihfabu nih thlahmi a hmasa bik Baptist missionary Judson nih cun Burma ram ah mission rian a ttuan i Khrihfabu tampi a dirh.

Baptist Khrihfabu hna nih Khrihfabu chung i zumtu zapi nih rel tti ding tiin a ttialmi zumhnak hrampi hi tu chan kan nih Baptist Khrihfabu pawl nih kan philh sual maw? Kan hlawt cang maw? Judson chan lio ahcun cu zumhnak hrampi (creed) cu Burma ram ah mission rianttuan ah a rami American Baptist missionary thar hna nih cawn a rak si. Ramchung um missionary hna zong nih rak cawn a si. Kawlram Baptist Khrihfabu hna zong ah rak chimh dawh a si. Zumhnak hrampi a rak ttial kum 1829 in a thih tiang vun tuak ahcun kum 20 reng lo cu zumhnak hrampi cu Kawlram Baptist Khrihfabu ah rel le cawn le cohlan a rak si.

Tuchan kan nih Kawlram Baptist Khrihfabu hna ahcun, Judson zumhnak hrampi (Judson’s Creed) hi a pommi zong kan um; a cohlang kho lomi zong kan um. American Baptist Churches USA chungtel Khrihfabu tam ngai nih a pom rih bantuk in a dihlak in a cohlang kho lomi Khrihfabu tampi zong an um fawn. Cu ve tthiamtthiam in, Southern Baptist Khrihfabu chungtel chung zong ah Judson zumhnak hrampi a cohlangmi an um bantuk in a pom lomi zong an um ve. Kan nih Chin Baptist Churches USA chungtel Khrihfabu chung zong ah Judson zumhnak hrampi hi a pom khomi le a pom kho lomi kan um. A cohlang duhmi le a cohlang duh lomi zong kan um.

Zei ti a si zongah, Judson nih a rak kan cawnpiakmi zumhnak hrampi cu Kawlram Baptist Khrihfabu tuanbia cauk chung ah ttial cangmi a si. Kan philh awk a ttha lo; hlawt awk zong a ttha fawn lo. Khrihfabu tuanbia hi thlen nawn i mer zong ah a ngah lo. A thli tein thuh awk zong a ttha lo; thuh khawh zong a si fawn lai lo. Judson zumhnak hrampi hi kan hramthawknak tuanbia a rak si tak hi, ti kan hngalhpi (recognize) i upat kan pek ding a si. July 13, 2022 Judson kawlram a phanh ni kum 209 tling ni ah Judson a riantuannak, a pumpeknak, a tuar-innak, le a zumhnak vialte philhlonak ah hi ca tawi tein upat ka pek. Bawipa nih Kawlram le Chin Baptist Khrihfabu dihlak thluachuah pe hram seh law, a biatak le lam ah rak kan hruai hram ko seh.